我要娶灰姑娘個繼母（上）
事情嘅開始係，我穿越咗。
我發覺自己拎住一隻玻璃鞋，有人同我講：「王子，放心啦，再搵多幾條街，一定會搵到您嘅夢中情人。」
明顯地，我穿越成為《灰姑娘》嘅王子，故事發展到宴會後，王子拎住隻鞋搵灰姑娘。
我早就覺得呢個故事好唔合理，假如王子真係咁鍾意灰姑娘，點會連佢個樣都唔認得，要靠隻鞋？
哼，我先唔會屈服於呢啲無理嘅劇情。
我將玻璃鞋隨手丟開：「唔搵啦，我突然覺得，我都係唔太鍾意嗰個女人。」
點知，隨從執番隻玻璃鞋，面有難色：「我哋已經公告天下，話王子憑玻璃鞋搵王妃，突然縮沙嘅話，不利於您嘅聲望啊。」
然後，幾十個隨從就簇擁住我向前行。
嗰一刻，我充份感受到命運嘅播弄，冥冥中好似有一隻手，逼住我去執行劇情。
我討厭呢種感覺。
行吓行吓，去到一間屋，屋裡面有一個阿媽同兩個女。
兩個女似乎一心想做王妃，好主動咁試鞋，幾乎想斬細自己隻腳，塞入玻璃鞋裡面。
呢種反應好尋常，奇怪嘅係，個阿媽同兩個女講：「你哋唔啱著㗎啦，得啦，試完啦。」好似好想我哋快啲走。
臨走前，屋內傳來奇怪嘅響聲，隨從神色一凜：「太太，你哋屋企係咪仲有其他女仔？每個女仔都要出嚟試鞋。」
兩個女馬上答：「冇啊冇啊，得我哋兩姐妹咋。」
個阿媽垂頭喪氣，喃喃自語：「點避都避唔過，王子都係要娶灰姑娘。」
我呆一呆，即刻叫所有隨從同兩個女退下。
隨從仲想講嘢，我板起臉孔：「滾出去！我要秘密審問呢個女人。」
我問個阿媽：「你啱啱提起灰姑娘，都係穿越嚟㗎？」
佢Ｏ晒嘴：「係啊，王子你居然係穿越？我叫阿珠，突然有一日，就穿越變咗灰姑娘個繼母。」
阿珠開始講佢嘅悲慘經歷，佢一穿越嚟，就見到兩個女蝦緊灰姑娘，仲討論緊去王子宴會嘅事。
阿珠知道，灰姑娘做咗王妃之後，繼母就冇咩好下場。
但事到如今，佢即使想改變態度，討好灰姑娘，都已經嚟唔切。
於是，阿珠決定禁錮灰姑娘，唔畀佢出席宴會。
但唔怕神一樣嘅對手，最怕豬一樣嘅隊友，阿珠仲要有兩個豬隊友。
兩個女臨去宴會之前，居然去嘲諷灰姑娘，糾纏之下，搞到灰姑娘走甩咗，成功去到宴會。
灰姑娘去完宴會，阿珠都心知不妙，盡最後嘅努力，再次禁錮灰姑娘，唔畀佢試玻璃鞋，點知都係出咗事。
阿珠嘆氣：「唉，我就諗，劇情係咪冇辦法改變。」
「我唔要做劇情嘅傀儡，我要改變命運，主宰自己嘅人生。」我嗤之以鼻：「我先唔娶灰姑娘。」
阿珠歡呼：「太好啦，咁你依加就走？搵第個靚女做王妃？」
我正想答應，突然靈機一觸：「不如我娶你做王妃。」
阿珠目瞪口呆：「我係灰姑娘個繼母……」
「夫妻最緊要有共同話題，得我同你係穿越者，我唔娶你娶邊個？」
我愈諗愈覺得有道理：「我哋要改變命運丫嘛，娶繼母先係劇情大逆轉。」
「但我係個寡婦，仲生咗兩個女。」阿珠好遲疑。
「唔係你，係你副身體。」我答：「而且古人早生育，睇你個樣，你副身體咪三十幾歲，如果喺現代，分分鐘仲溝緊仔丫。」
話時話，阿珠都生得幾靚，係「靚女上司」嗰種感覺。
阿珠都俾我勸到心動：「好，我嚟做王妃，咁就唔駛擔驚受怕，怕灰姑娘做王妃之後報復我啦。」
我拎隻玻璃鞋出嚟，阿珠皺眉：「隻鞋係灰姑娘嘅，我未必啱著喎。」
「一定啱著。」我扭一扭個鞋跟，隻鞋嘅大細就可以自動調節。
阿珠問：「嘩，點解嘅？」
「我啱啱同人試鞋嗰陣發現嘅。灰姑娘隻腳又唔係畸型，點可能得佢先啱著。」
我咁樣估：「灰姑娘特登留低隻伸縮鞋，咁我搵人嗰陣，見對方唔係佢，就可以調到隻鞋唔啱著。」
然後，我叫晒啲隨從入嚟，幫阿珠著上玻璃鞋，深情款款咁講：「你，就係我要搵嘅王妃。」
所有人都呆晒，天空中好似有烏鴉飛過。
「阿媽你……有去宴會？」阿珠個女問。
下集：https://bit.ly/3092vpt
將專頁設定為「搶先看」/ "See first"，最新故仔馬上睇！
我喺棺材度醒番：https://goo.gl/6f9HAK
我嘅職業係：厲鬼：http://bit.do/fmtGi
#短故 #短篇 #小說 #陳美濤 #廣東話 #粵語 #tomatochan #我要娶灰姑娘個繼母
Search